alex

「條條大路通羅馬」應該係小學學嘅，上到上學就學埋”All ways lead to Rome”呢一句。今日興之所至，就問吓ChatGPT羅馬嘅衰亡，試吓AI掂唔掂。 (我唔係讀歷史、唔精通歷史，亦唔喜愛研究歷史，唔肯定以下內容ChatGPT有冇老作/老點。) 盛世之後，問題先至浮面 羅馬曾經係秩序、效率同制度嘅代名詞。法律清晰、道路四通八達、行政體系嚴密。盛世時，呢套系統幾乎可以「自動波」——就算換咗個能力一般嘅官員，都唔會即刻出事。 但問題係：制度愈成功，愈容易掩蓋人嘅無能。 領導層「安全但保守」 去到後期，羅馬嘅統治者同高官，最大優點唔係遠見，而係唔出事(多作多錯，少做少錯，唔做唔錯)。決策重點唔再係「點樣令城市更有活力」，而係「點樣唔畀人怪」。結果就係： 表面穩定，實際停滯。 官僚膨脹，責任蒸發 羅馬後期行政架構愈來愈複雜，文件、程序、層級不斷增加，但責任反而愈嚟愈模糊。出事時，冇人真係要負責；冇出事時，人人都話自己有功。 市民開始覺得： 「政府仲存在，但好似只係為咗自己存在。」 民間活力被慢慢磨走 當制度唔再鼓勵創新，只要求服從；當規則唔再服務社會，只服務體系；人民自然就會選擇「少做少錯」。 商人縮手、學者噤聲、年輕人只求穩陣。城市仍然燈火通明，但向上流動已經變成神話。 衰落唔係結局，而係過程 羅馬唔係突然消失，而係喺好長時間入面，慢慢由「中心」變成「回音」。制度仲喺度，名號仲響亮，但影響力同信心，已經悄悄流走。 歷史從來唔會一模一樣，但佢好誠實。當一個地方開始將「唔出錯」擺喺「做得好」之前；當領導層只擅長管理風險，而唔敢承擔責任；當制度變成目的，而唔再係工具—— 衰落，往往已經開始，只係未有人願意用呢個字。

支持紐卡素二十幾年，這些年來，球會經過起起跌跌、高高低低，當然跌、低多好多啦。終於等到支持紐卡素二十幾年，這些年來，球會經過起起跌跌、高高低低，當然跌、低多好多啦。 終於等到2021年，終於傾得掂沙特油王(aka PIF)收購。呢幾年繼續係高高低低，但我自己理性上覺得成績係收貨有餘。但係做球迷，又或者其他任何其他林林總總各類人物、items嘅「迷」，好多時都只係自我感覺理性。球迷個個FM上身，總會覺得呢樣做得唔釨，個樣做得差，應該買邊個球員，場波應該點排陣…… Okay，等我都FM上身一下: Transfer Turnmoil 喺剛過去嘅轉會窗，以最後球員出入後嘅隊員陣容，其實算中上。 不過睇個過程，其實觀感好差。身為傳奇大球會、有錢有地位有名聲嘅利物浦，用埋啲藞䕢招買Isak。不過唔可以怪人，其實紐負責隊員轉會嘅負責人做得非常差啦，唔知當時實際上係邊個負責，時任CEO有大病已經頂咗好幾個月(唔知點解搵唔到/唔肯請人replace)，DOF又剛剛走咗人(直到呢一刻都未請到人replace)。結果喺轉會窗，紐好多次人傾球隊，傾來傾去，到傳聞話差不多成事就會有其他球會搶咗，Delpa、Pedro、Mbeumo、Trafford、Etikite、Sesko… 問題係1. 買人冇plan B，或者應該係plan 衰咗，好耐先identify到個plan B出嚟。 2. 買人太focus喺本土球員啦，人哋見你買人心急買人，又見你budget，咪劏你囉；都係講供求關係嘅啫，你去吓其他國家嘅聯賽球會咪會搵到價錢合理啲隊員囉。 3. But after all，都係管理層嘅問題，冇strategy、唔夠果段、眼界窄、唔夠人玩。希望新嘅CEO有料到，同埋快啲請返個DOF。 主教練問題 你又唔可以話Eddie Howe冇料，佢man management應該係幾好，好幾位球員被佢tune過幾咗幾個levels，而且可以幫球會捧到盃。 但係佢選人同排陣成日都有問題。主要問題就係成日用死同一班正選球員，冇變通，隊員都好易傷。就連換後備出場都係冇變通。 講吓幾個球員: Pope的確撲救成功率高，好龍門就梗係要救到波啦，但佢用腳真心差，現今龍門腳下功夫好重要，重有佢出禁區用腳好差，舐過好多次嘢。考慮整體優缺，其實Pope質素係算中上。但Howe應該真係好鐘意Pope。明明Dubraka就唔係差Pope好多(if not一樣咁好)，但Howe就係唔用佢，舊年Pope受傷時先肯用Dubraka，雖然佢當時表現得非常好(甚至我覺得如果唔係個段時間打得咁好，今年我哋冇得打歐聯)，但係當Pope一傷癒，就立即攞返正選，Dubraka出都冇得出。我覺得咁樣對Dubraka好唔公平。今季借咗Ramsdale返嚟，唔知會唔會成季齋坐喇？ 之後就講Willock，佢受傷後根本就係踢唔返以前嘅level。當然，佢近幾季都唔係正選嘅，但就有第一後備咁，中場換人第一個佢出嚟，但佢又係次次都冇作用個喎。以前係Anderson、今季賣咗Longstaff、而家仲有Miley，Anderson就係Howe唔識用，你睇人哋而家踢得幾好(當然舊年係被迫賣佢嘅)；Longstaff喺部分球迷眼中好似廢廢地，但係用佢替換Joelinton係點都好過Willock啩；Miley又係，明明好有potential，Howe就係好少出佢，但你又怕唔夠人所以唔肯外借佢出去。我唔明點解，既然出Willock都預咗冇用，退一步就算預咗出Miley或者其他年輕球員都係冇用作用，咁就更加畀機會佢哋出場先有機會進步。 玩針對 都係既得利益者問題啦，已經有米嘅球會就係比仔更懂得玩財技，而且有啲嘢佢自己做就得，你做就唔畀。冇計，佢哋係傳統嘅big players吖嘛，就係唔想你發圍咁囉。所以就算你有個油王爸爸，你有無限零用錢，人哋都有辦法唔畀你使。英超所謂嘅Profit and Sustainability Rules究竟係保障細球會，定係保障原本最頂層個幾隊呢？你知我知大家知。

或者真係You don’t have any cards啦，只有侵侵自己有一手好牌都唔定。但係佢若然認真impose嘅tariffs，咁應該全世界攬炒喇，詳情請參考n篇坊間分析。 但係呢，坊間又有啲人/傳媒又不停淡化tariffs對國家同埋本地嘅影響，當然更加會對侵侵口誅筆伐啦。但係，唔該，鬧還鬧，侵侵係CLS就梗㗎喇，但係都真係要認清事實吖嘛，經濟原本已經夠差，而家係驚你唔斷氣揸多你條頸一下。 想講吓賣港口單deal，當初全港都大讚誠哥。其實常人都應該會覺得呢單係good deal啦，主要係價錢合理，我覺得做到所謂嘅不亢不卑(有冇用錯term呢？我中文差)，大家都有下台階，誠哥套現兼可以轉移風險、國家又不失體面、侵侵又求仁得仁。總好過侵侵迫巴拿馬出手要取消和記港口專營權啦…… 但係之後事態發展呢大家都已經知…… 而家消息滿天飛，有消息話阿爺協調中港富豪出手收購。邊有咁易，或者問邊個會想接手呀，邊個想做磨心？ 奇怪在咁大單嘢，誠哥應該事先會同阿爺溝通好喎。雖然阿爺對誠哥一路應該好有意見㗎喇，但呢單嘢咁大，關於港口利益，誠哥冇唔使問準阿爺，如果唔係，就真係會「別讓李嘉誠跑了」。 之所以政治家係政治家，一般絕大多數人都唔係，因為有啲嘢只有佢哋識點玩，只有佢哋先睇得通。

話說2024年諾貝爾經濟學獎得主係Daron Acemoglu、Simon Johnson同埋James Robinson。 最簡化嚟講，獎項係表提佢哋對制度形成以及制度如何影響經濟繁榮嘅研究，詳細少少其實係研究制度嘅設計可以點樣影響國家嘅經濟政策，以致國家嘅穩定同埋長期發展。 微觀啲講，我輩中學時候已經學過「制度改變人的行為」嘅概念啦(唔係都搞唔掂A Level啲題目)，但係以我所知而家嘅中學係唔教㗎喇。 當然，呢幾年無論係喺呢個昔日最經齊自由度指數排第一嘅城巿，抑或是海外好多唔同嘅地方，都係因為種種原因，而造成制度嘅改變。我哋先唔講政治。講經濟——制度嘅改變可以好快就玩爛經濟，你出街望望個巿況，唔到你唔信啦。 不過其實我唔係想講香港，而係想講美國。喺我細細個嘅時候，美國係被marketed成一個自由、民主、法治、富庶、人民質素高嘅國家。但係過咗唔係好耐後，已經知道呢個國家唔係想像中咁好，而且都好多壞人吓；又過咗幾年，學識咗「偽君子」呢個term，正呀，用「偽君子」形容美國就perfect match啦。咁又再過咗一段長時間，我都係覺得美國係偽君子，而且都「偽」得幾誇張。直至侵侵上台(以及再上台)，偽君子成為真小人。 其實好難講偽君子定係真小人衰啲，不過都係個句：小人當道，誰大誰惡誰正確。最睇唔過眼係霸權主義啦，我相信絕大多數人都會捍衛自己國家。我唔明點係啲人會以為侵侵再上台必定會打擊中國，攬炒都要有個底線吧？侵侵上台，被打擊嘅係(某程度上)美國以外嘅全世界(所謂嘅America First)。不過其實佢咁搞，in the long run，美國最終都係受害，你知我知單眼佬都知，係班冒毛唔知/扮唔知。 今日侵侵同布甸眉來眼去，難保聽日唔會同我哋習大大握手言和，再同金仔互相親吻，之後同猶太人反面。政治嘅嘢，我就睇唔清喇。 不過咁講，無論係玩爛咗嘅制度，定係小人當道，我相信好大程度下，喺長遠而言，制度係會(被)修正嘅。 希望明天會比今天好。

我得承認，情書係一套我非常喜歡嘅電影，已經睇過好多次。劇本好，拍得好，演員演得好，音樂好，電影場景靚。記得年少時，喺房入面貼咗情書嘅電影海報。在若干年後有能力到北海道旅行時，經過小樽的電影拍攝場景，當堂感覺返晒嚟。 初次認識中山美穗，應該是讀小學時，在TVB看配音日劇偶像媽咪，劇情已經完全忘記了，只記得中山美穗和我覺得更加美麗的後藤久美子(後來嫁咗俾F1賽車手阿里斯就退出咗)。 中山美穗在突然離世時，新聞報道中後被譽為日本殿堂級演員及歌手；但係就喺不久前佢仍在世時，媒體久不久就冇嘢搵嘢嚟炒作吓，話中山樣容貌崩壞(CLS，五十幾歲有五十幾歲嘅樣唔係正常不過嘅事咩?)，又再之前，常炒作佢感情生活、不倫、出軌云云。Anyway，就係冇乜講佢啲作品(咁事實上佢又唔係屬於多產嘅)。 好可能，中山美穗喺情書嘅演出太完美，形象太深入民心，於是中山美穗等於藤井樹/渡邊博子，仲要係唔會老唔會變嘅。 總有一天，我們會成為別人的回憶，所以盡力讓它美好吧。 PS: 喺Netflix睇咗一次情書，渡邊博子喺雪山同(男)藤井樹喊話依然揪心。

每年夏天都好忙，但係今天分外忙，大環境差，做嘢要比正常時期出多20%力，但都未必收得返以前80%回報。 Anyway，夏天看了巴黎夏季奧運，首先想講嘅係佢開幕禮運動員進場反傳統，唔會好似以前運動員就咁(行)進(運動)場，而係沿塞納河乘船進場、經過地標，好有趣。另外就係比賽場地安排真係抵讚，佢安排著名地標改裝成比賽場地，例如喺大皇宮睇張家朗同埋江旻憓攞金牌啦，同埋喺巴黎鐵塔下面打沙排。下一屆洛衫磯搞奧運，應該會頭痛點樣先搞得好。 至於最深刻的比賽項貝，除咗香港運動員有份參加(無論有冇獎牌都支持)，有三項我想highlight記錄一下。 第一就係女子街式滑板金牌嘅吉沢恋。技術型! Full Repay: 如果傳媒冇吹大的話，佢嘅背景真係好奇幻，都幾勵志。 第二係韻律泳金牌嘅中國隊。完美展現技術與美感! Repay: 另外就係美國女子體操Simon Biles，克服心理障礙，純技術同埋難度表現。 幾個項目嘅合輯: 講完奧運，講吓最近忙啲乜。就係忙搬屋。搬過幾次屋，今次特別忙，已經係唔算太多嘢要搬㗎喇，但係因為時間好緊迫，所以好多決定同行動都要壓縮喺好短好短嘅時間做。希望一切順利。另外我想記錄一下嘅係，喺2024年，住宅租金真係高到CLS!

已經被大多數遺忘咗嘅ICQ，今次終於要收皮喇。喂，你重記唔記得自己個ICQ UIN（如果你有的話）？如果冇記錯，我個UIN應該係1613xxx，不過唔知個password重係唔係有效。 睇咗啲報道，話今次ICQ關閉係代表一個時代嘅終結云云。其實講真，如果話係時代嘅終結，咁呢個時代應該已經終結咗20年。 當年微軟都係用佢嘅套路啦，內置MSN Messenger喺Windows，加埋AOL收購咗ICQ之後加咗啲新功能同埋加插廣告banner令程式又慢又臃腫，返工要扮工，用內置嘅程式緊係方便啲，啲人慢慢轉咗去MSN。至於之後ICQ再賣咗畀俄仔，MSN都收埋檔，連AOL都轉咗幾次手又係其他故事喇。 早幾年前俄仔推ICQ手機app，好似曾經吸引咗咗一批舊用戶download同埋嘗試login返個封咗塵嘅account，呢股懷舊熱維持咗幾日！之後，就冇之後喇。 其實喺呢個年代，因為資訊流通，一件產品或者一個app可以爆紅得好快，但係因為通訊軟件個用戶群好廣，又唔同講法。例如有一個通訊軟件新出咗，我覺得好好用喎，於是我唔只自己裝咗，我重介紹埋畀身邊嘅人安裝。但只要其中有部份人唔肯轉用，其實最終都係冇乜人會用，或者變成小眾工具（例如Signal）。呢個應該係所謂嘅networking effect。畢竟，用與唔用，唔係只係因為功能/效能，有時要睇埋嗰個地區嘅norm，有時重要睇埋國家力量/手段咁囉。 見到有人評論，話懷念ICQ嗰個年代，嗰個年代人好似單純啲。係呀，真㗎，諗吓而家每日收到幾多電騙電話、短信、WhatsApp、微信女，呃你錢、嘥你時間。喺以前個年代，最多都係行行吓街，有條友話自己係星探氹你上去佢office然後呃你錢，又或者買電器入咗間黑店落閘唔畀你走(呢樣都幾恐怖)。科技進步嘅其中一個結果，就係令個人嘅生活變得複雜吖嘛。

重啟——restart，究竟呢個term係正面定係負面嘅呢？見到restart，我第一個想起嘅情景就係部Iphone出咗問題要side button – volumn down 熄機再開。 又咁講，部電話出問題正常都應該係負面，但係俾得你restart，至少啲按掣重有反應；restart完load得入個正常畫面，至少有希望。咁都係正面。 但係要接受嘅事實，唔係所有嘢都可以重新嚟過。就正如boot得起入個畫面，都唔代表可以正常用到啦。 Anyway，碌到最底，呢個blog原來係2005年開始寫，再之前應該唔係用呢個系統寫blog，夾埋應該寫咗二十幾年，亦都荒廢咗好幾年。啲人已經由寫個人網頁到寫blog到碌Facebook再到而家碌IG(& 小紅書？)，今時今日重寫咁多廢話，我都覺得自己好old school。心血來潮，不如清空晒啲舊posts，重啟一次好嗎？